West Ambae Groundbreaking

Kavman tru long Ministri blong Infrastrakja mo Pablik Utilitis (MIPU), i bin witnesem Graonbreking Seremoni bitwin Vanuatu Gavman wetem Chinese Gavman mo Kontrakta, 'China Civil Engineering Construction Corporation (CCECC)' folem Projek blong putum kolta long west blong aelan blong Ambae.

Ambae Rod Projek bambae hemi fes bigfala divelopmen long saed blong rod infrastrakja long aelan ya. Divelopmen tru long impruvmen blong rod infrastrakja ya bambae hemi kivhan long ekonomi, helpem sosol progres long olgeta komiuniti blong oli kam moa resilien, mo blong mekem sua se akses long olgeta seves blong Gavman I kam moa gud.

Long namba 9th August 2023 - Vanuatu Gavman i bin saenem wan agrimen wetem CCECC long wan amaon blong RMB 330,000,000 we hemi ofa long 5 bilien vatu. Projek ya bae hemi tekem 50 manis (ofa long 4 yias) blong komplitim.

Projek ya hemi kavaremap konstraksen blong 15.432 km rod we bambae oli putum kolta long hem, bildim drenej mo sam narafala strakja bakeken we bambae i stat long Devils Rock mo i ko finis long Lo-One.

Vanuatu Gavman, tru long MIPU, bambae i mekem sua se projek ia bambae i provaedem wan strong rod infrastrakja we bambae i benifitim evriwan we oli usum rod ya long evridei laef blong olgeta.